Հունվարի 27-ին ԵՀՀ-ի գրասենյակում տեղի ունեցավ Կայուն բարեփոխումներին ընդառաջ․ կրոնի կամ համոզմունքի ազատության խթանումը Հայաստանում եռամյա ծրագրի փակման արարողությունը։ Միջոցառմանը ներկա էին ՀՀ-ում Նիդերլանդների Թագավորության դեսպան Նիկո Սխեմերսը, ՄԻՊ աշխատակազմից Նինա Փիրումյանը, կրոնական համայնքների և ազգային փոքրամասնությունների ներկայացուցիչներ` այդ թվում նաև Բահայի համայնքի ներկայացուցիչները, լրագրողներ, հետազոտողներ և հետաքրքրված այլ անձինք։ Ներկայացվեցին ծրագրի շրջանակներում կատարված աշխատանքները՝ նվաճումներն ու մարտահրավերները։ Հատուկ ուշադրության արժանացավ www.kronadaran.am կայքը, որը տարբեր կրոնների մասին ռեսուրսներ է տրամադրում թեմայով հետաքրքրված հանրության համար:
Միջոցառումները կրում են շարունակական բնույթ և նվիրված են Հայաստանում կրոնական և ազգային փոքրամասնությունների իրավունքների պաշտպանությանը:
Բահայի համայնքը այս կազմակերպության հետ համագործակցում է 2017 թ-ից սկսած: Համընդհանուր ջանքերի և կառավարության հետ համագործակցության շնորհիվ փոփոխություններ են կատարվել մի շարք կարևոր ոլորտներում: Կրթական համակարգում շտկումներ են մտցվել Հայոց եկեղեցու պատմություն առարկայի մեջ: Ոստիկանության մասին ՀՀ օրենքի այն կետը, որտեղ նշվում է, որ կրոնական կազմակերպության անդամները չպետք է ծառայեն զինված ուժերում, համարվել է հակասահմանադրական: Կազմակերպվում է նաև ամենամյա լրագրողական մրցանակաբաշխություն ՀՀ-ում բնակվող կրոնական և ազգային փոքրամասնություննների կյանքի և գործունեության մասին պատմող լավագույն նյութի համար:
Կազմակերպությունը մշակել է նաև խտրականության և կրոնական կազմակերպությունների մասին նոր օրենքի նախագծեր:
Հուսանք, որ այս նախաձեռնությունը միակը չի լինի իր տեսակի մեջ և մոտ ապագայում կունենանք մի քանի կազմակերպություններ ևս, որոնց կատարած բարեփոխումների շնորհիվ մեր երկրում կավելանան մարդկանց և կրոնների միասնության ու հավասարության ջատագովները:
